Tornèt la messa en òc a Alban !
Aprèp dos ans de silenci, la lenga nòstra s’ausiguèt dins la glèisa d’Alban lo dimenge 21 de novembre. Lo preire Jòrdi Passerat, vengut de Montalban, presidèt la celebracion acompanhat per nòstre curat Joan-Claudi Ferret.
Dins son presic, manquèt pas de parlar del Christ Rei de l’Univèrs festejat aqueste darrièr dimenge de l’annada liturgica e que vesèm al centre de la glèisa. Lo Christ Rei de l’Univèrs : non pas un rei de triomfe mas un rei de bontat, un rei d’amor e tanben un rei de dolor, de dòl.
Darrièr dimenge de l’annada liturgica ! Jòrdi Passerat nos faguèt remarcar que, mai que las autras annadas, nos podèm sentir coma a la fin d’un espectacle ont se demargan los decòrs. Èra plan la darrièra ! Lo 28 de novembre, un biais novel de dire la messà marcarà la debuta de l’annada liturgica novèla.
Aprèp la messa, la còla locala del Secors Catolic serviguèt lo veirat de l’amistat plaça de la Justicia.
La salla Raquel Biau, fòrt plan decorada, se dubriguèt sur presentacion del pass sanitari pel repais partajat.
La còla de preparacion de la messa e los benevòls del Secors Catolic mercejan los cantaires, musicaires, legeires… Mercès a vosautres que sètz venguts participar a la celebration, a vosautres tanben que sostenètz las accions dels Secors Catolic.
E mercès a nòstre curat que permitèt aquela messa en òc et al preire Jòrdi Passerat que celebrèt.
A l’an que ven !
